আইদ্ দে অঁঅন মাসত তোঁয়ারে তুল্লুম ঘরত
পচিমর চালত নোয়াছন দিয়ম আরেক পরত
গোনডার ছাঁছত লাগি তাইবো আ-তরছাপ
পাক ঘরত চুলার ডেকতুন উডিবো গরম ভাঁপ।
ঘরত আইলে বারি দিবা তোঁয়ার রাঁধা ভাত
আরা জীবন্নান থাইকুম তুই-আঁই এক সাথ
ঘোয়াডা দিলে তোঁয়ারে দেইঅয়ম বেয়ালা
তুই বইলে প-অ্র অইবো উডানর ডেয়ালা।
এত কিছু ভাবিদি আর বানাইর ওদা’ই স্বপন
আঁর মনর হতা তোঁয়ারে ন’হই রাক্খি গোপন
কেনে হইয়ম কেন গরি হইয়ম নফাইর দিশকুল
বিলত ফুডি থাঁইকে একশ্ আস্টওয়া পদ্ম ফুল।
